جبت جرحي على جرحك

جبت جرحي اعله جرحك جيت عناي
اصوغ من الجرح مرهم يداويك

گلت جنه اصيرن رغم الجروح
ما ادري تحب دوني اليجويك!!!

تهوى انته الجمر جا غير الك روح؟؟؟
غير اتگلي حتى بنار اخليك

أمشي اعله الجمر واتحفه عالنار
ملعون اليجي يمك يطفيك...

أشفت من غيري گلي الغير شنطاك؟؟؟
واشتاك الدرب تالي ألمت بيك!!

انبكت مني غفل واسمي اني مبيوك!!
جذب انته الرحت وبهاي رجليك

عيوني فراش الك لو تغفه وتنام
ومن تبرد حبيبي بجفني اخليك

اجر جدمي اعله دربك وامشي تعبان
كل هذاواگول بگلبي ألاكيك

لاكيتك شفت غيري المشه وياك
احس كل دمعه نزلت صرخت أشبيك؟؟

جازاك بهجرما انصف وياي
لون ينطيك عمره ما يجازيك!!!

جبت جرحي اعله جرحك جيت عناي!!
واريد عيوني تسكت حتى ابجيك

راويني اشعمل بيك انته الفراك؟؟؟
ولكن لا على بختك اراويك!!

لاغزر ملح..لازاد..لاماي
ماغزر حناني گلي شنطيك؟؟

خلص دوري بعد ما امثل وياك
خله يمثل وياك النكت بيك!!

ابدي الماي لوانته صرت ماي
واكص جفي اذا ما راد ابديك!!

على لساني حبيبي جانت أتلوك
وهسه تلوك الخاين يسميك

جفك من رماني بسهم الفراك
تيهني السهم كتله انه ادليك!!

خجل مني السهم من شاف الجروح
صرخ كُلك جرح جا وين أذيك

صرخ كُلك جرح جا وين أذيك؟؟؟