أحس اني متغير

الثلاثاء مارس 06, 2012 2:18 pm

احس متغير اني ومالي خلك الناس
واحس تعبان كلبي من الوكت مقهور

مثل غيمة حزن تمطر علي كبريت
وانه بنار عايش والدموع تفور

كل يوم الأمس مثل الفيلم ينعاد
وباجر والامس والجاي نفس الطور

غيرني الوكت غيرني حيل وياه
وفوك الضيم الاكشر بييه ضل يدور

ناعور الدهر يسكيني جان اشعاار
وافتر الوكت وانه الصرت ناعور

جنت اضحك واسولف ويه هذا وذاك
عله غفله ولكيت الناس كلهه تجور

ماتت للأسف كل بسمه فوك شفاي
وياحيف الرماني بلاذنب مغدور

طرت بجناح واحد للفرح فد يوم
اشو حته الفرح ردني بجنح مسكور

ضيعت البخت وانه الجنت محضوض
حته ويه العشك ما عشت لحضه بنور

يـــــــــــا كلبي شكثر عذبتك انت وياي
احس كلبي عله كلبي من الحزن مفطور

لتكابر بعد واكتب جــــــــــروح البــيــك
لتمثل بعد كلش صعـــــــــب هـــــالدور

يــــــــاكلبي الندم ياكلني صبح وليل
شيبتك غصب وك انه مـــامعذور

جبت بيدي العذاب وعذبيتك ليش
جنت مرتاح انت وماجنت مجبور

استاهل حزن واستاهل اكثر حيل
عساني بنار أشب وبالدمع معصور