هدني بداعة الله

الخميس يناير 05, 2012 3:06 pm

هدني بداعة الله
دخيلك لاتصدلي بعينك التذبح
انا مجروح كبل وارحم بالمجروح

هدني بداعه الله ارحمني اترجاك
اي موضوع عن العشك لاتفتح

ولك تعبني ذكرك غادر التفكير
شعندك بالعقل بس تسرح وتمرح

شلك بمتحان وساعه ماقاريك
حتى من ارد اغشن بيك ما انجح

يسمر مالي حيلك وانت حسنك جيش
بطرك روحي شفتني وجايني مسلح

بارود العمر شفتك دخلت انذار
خايف من شرار عيونك التجدح

متاخرة الجفوف الليل غطه البوب
لدك باب كلبي الوكت مايسمح

منو الدلاك جرفي الغافي من مسلمن
وياهو العلمك بطيش بي تسبح

مفاتيحي بديك شجابهن يصغير
وصفت روحي بمزاجكك تقفل وتفتح

خايف من صدك عاشكني حد الموت
وخايف ماتضل وياي ماتنصح

طولك عيد جاي يريد اليلاكي
ركض وجهي وتذكر مو وجه يفرح

غنه حجيك يعمي يريد كعده ليل
ومسايه غروب روحي غناك مايصلح

من كتلي احبك تعرف شسويت
لو اشرح الحاله مسلمن اضل اشرح

تحبني شعلمك ماخفت مرتديت
مافكرت مرة تشوف حل اصلح

تاه من شوكت جفنك بدرب الليل
ومن يمتى عليك الصبح ماصبح

دمعتين مسحت وتسبني طول اليوم
ومن عيني عليك دمايه كمت امسح

يسمر مالي حيلك وانت حسنك جيش
بطرك روحي شفتني وجايني مسلح