عشت سنين عمري موگف الدگات

الخميس أكتوبر 18, 2012 2:59 am

عشت سنين عمري موگف الدگات
هجرت گليبي اذكر من زغر سنّي
أخاف امن العشگ لا يلفي بالدلّال
يتگرّب اگلنله ابتعد عني
أخاف أهوى و أحب و اعشگ مثل هالناس
اعرف عشگ هذا الوكت يالمني
اعرف ما يصح العشگ للدلال
اضن بلا عشگ دلالي متهنّي
و بليله العشگ دگ اعلة گلبي الباب
و أنا گلبي فطير و راح يسودني
اگلّه شمالك توالف عشگ چذّاب
و يغلّس عليّ ما چنّه يسمعني
طعنات شكثر حمل دليلي و شال
و سهام شكثر بگليبي لاحنّي
حمّلني وليفي جروح فوگ جروح
سابع جار يگعد لو سمع ونّي
و هذا آنه اعترف و الخنجر بظهري
خنجر غدرك ألطعناته تالمني
احبّك و ادري ما تستاهل الدمعات
احبنّك رغم حبّك معذبني
و اعرف ما تضحّي و لا تودني بيوم
و اعرف آنه احبّك و انت متحبني
رغم كل الحچيته و رغم كل ألصار
رغم دمعي و عذابي و حسرتي و ونّي
رغم حالف أهجرك و اهجر الأيام
و اهجر كلشي بيك اليوم يذكّرني
و اهجر دنيتي و أحلامي و إلّي چان
و اهجرهه الصور لن بيك يذكرنّي
و اهجر كل مكاتيب الهوى الچذّاب
و بكانات إلّي چانت بيك تجمعني
رغم كل هذا اقرلك ضايع بليّاك
و اقرنلك طلعت انته إلّي هازمني
صرت چني حمامة مكسره الجنحان
احضن بالقفص و القفص يحضنّي
مفتوح القفص و مشرعة ألبيبان
أحاول اطلع من القفص لكني
ما اگدر أطير بتك جنح مكسور
حاولت شكثر بس أحس خانني
چنت حر و أطير و ما ألوح الگاع
تعاينلي الخلگ عالشجرة لو اغني
مصاييد اشكثر حاولت بس ما فاد
ما أنصاد اگولن چان كل ضنّي
و لمّن عاينت بعيونك الحلوات
نزلت اعله القفص و اعترف صادنّي
نزلت اعله القفص و اعترف صادنّي