الك نيه ترد لو ارجع الحالي

الإثنين سبتمبر 17, 2012 9:55 pm

غمها من دنيا التحط للعين ديرم
وللشفايف غمها جابت مكحله

الانطت الخيال هزله من الكدايش
واطت الغمان صلحه محجله

موش كلمن شايل البيرق يهوس
البيارق كوه بالذله اتجتف لون ما شالتها جف معدله

وموش كلمن سرخن الذرعان خوَف
بلا زنود درعم العباس رجف كربلا

يالدكيت صدرك كوم اجتني الكوم
وجف نيرانهم كض طارف ذيالي

حرت جم دوب اطبطب كل كتر بي نار
عفت روحي بلهبها ورحت لاطفالي

ما خفت اعلى روحي تلوج بيها النار
خفت ينفضح ستري بهدة اشكالي

جان النار صارت برد لابراهيم
النيران استحت من فرت اطفالي

يتباهه البشر لو عد بشر معزوم
وانا جدي دعاه واستقبله العالي

طب جدي العرش من غير دكة باب
وفرشوله النفيش ونشروا الغالي

وابويه اول اليهد لو صار وكت الزود
وكت فض الغنايم لو حظر تالي

وامي اتربعت اعلى عرش الحوض
الماترضى امي عليه انلعن للتالي

واخوي اسمه المروه ابو الفضل سموه
الوالي تلوك اله وما غيره الوالي

ترضى مروتك انه الألاكي الكوم
وانه الطولي يتحسر شوفة اخيالي

لو راد يتمعن اعلى طولي العيد
تحد غيوم عفتي يغطن هلالي

انه غابة حياء ومحمله داير حول
ومتروسه شرف ومتلتله سلالي

جبل عفه و وقار وقمته هامة زود
ابنكطت مستحاي يفور شلالي

تتشلبهه علي النايبات صفوف
ويردني يكسرني خشم عالي

انه رُباة ابوي وللقيم ديوان
ما ابرطم ابجية ذلالي

انـه ادري الكفاله الإ بختم وشهود
وانه بكلمتك شديت ترحالي

ادري بكلمتك تعرك خجل وتموع
وبس بكلمتك شد راس دلالي

جا هيج الكفاله تذبني بين اجناب
ما هذا مرامي بيك ياغالي

انت الي كلت بيناتنا العباس
تروحين وتجين امدلله بجالي

هاي انه اجيت وكوم رد وياي
لا تعوف الذياب الشرسه تبرالي

من تمشي بصفي جن عشيره احذاي
وتبرالي عساكر كون تبرالي

شبعد درب المدينه ولان انت وياي
رمشة عين اضن صار ايتراوالي

اجه كلشي اعلى بالي وكلشي كلت يهون
ومال تعوفني ما جايه ابالي

كبر راس الوكت من شافني بهالحال
لا سكف الحمالي ولا اخو التجتالي

غمك ياوكت وتريدني اترجاك
وانت الجنت تاكل فضلة الوالي

ماهمني العطش ماهمني طاري الموت
لأحط اصبعي اعناد بعين جتالي

ولا اهم سوطهم محالل وموهوب
خل يشبع عوافي من المتن مالي

لجنها من العيون تناهشت مكفاي
وانه كحيلة خدر والستر خيالي

كتلك اطني ايدك كوم يالمعتوب
بعدهه جفوف ايدك تلوح حسبالي

لو كصرت جفوفك مستحاك يلوح
ويعت كوه الخدر ويجيبه كبالي

هاي انه اعلى راسك خصني خويه بعين
الك نيه ترد لو ارجع لحالي

بداعة اخو زينب بالي صار عليك
وانه اللي كبل ماصاير ابالي

عينك حمره خبطت بيها دم لو غيظ
لو طك مستحاك بعينك ايلالي

دمك لونه فاتح موش طوخ اللون
اظن وياه عرك كصه يتراوالي

شفت جودك يندي كلت اظن بي ماي
ثاريه إتعرك جي لان رجع خالي

البيرق مالكيته اعلى الثرى مطروح
مد ايده العرش دك بيرقك عالي

لان لوسامح الله بيرقك لو طاح
كل (الله اكبر) بعد ما نلكه

ياهو الكال انه الشكيت ثوبي عليك
شكيت الكلب بس ثوبي ما اشكه

وياشعر الانثره وانه رحت وياك
صوب المشرعه جود و وفه ودركه

تصح دركه تجل واتاني طكت السيف
وانه اختك الآكي سيوفهم ملكه

ماكولن كمر عنك يراهي الجود
وانه شفت الشمس بالجود متعلكه

لا..لا..لا يخسه العطش لمن يمر طاريك
انت العطشيته ويبست حلكه