قصائد عراقي

الأحد سبتمبر 09, 2012 1:26 am

لاتنساني يالما لحظه ناسيك

ومنو هذا الذي يخليني انساك

أتذكرك كلش خصه بالليل

أذكر دمعك وأذكر البجاك

وأذكر أهلك وناسك والايام

واتذكر شكو واحد حجه اوياك

ولك والله وكَت خلاني اهم بيك

ولك والله وكَت تنساني خلاك

رخيص انته وأكو من عندك هواي

بس كَلبي اليحبك غالي سواك

أصفن ويه نفسي واحجي مرات

وأظل انعه اعله روحي وروحي تنعاك

كَبل جنت آني وردة وتصحه كل يوم

كل نسمة عطر من عندي تسواك

كَبل لاشوف وجهك جنت مرتاح

وعلي الدنية كَبل حلوة بلياك

واجيت انته بدموعك ومنحني الراس

كَلتلك ها ,, منوه؟ وليش بجاك

وحجيت انته وكَلت خل استعز بيك

وجبرت الروح خاطر ترهم وياك

ماتمشي اعله غيري اتعرفك الناس

بس حظي الامخربط كَوه مشاك

شكَد كَتلي أحبك كَد النجوم

ولك كَتلي أحبك كَد الافلاك

اذا هنانه جنت أمشي تجي هنا

واذا هناكه اروحنهم تجي هناك

جا وين الحجي أوين المواعيد

لأن يم غيري بالك غيري نساك

ومنو هذا الرحتله وإشفت بيه

أريد اعرف مثل منطيتك انطاك

كلمن مستواه ينقاس باللاخ

جنت وياي عالي غيري نصاك

قصتنه انتهت خيط الفجر لاح

صيام الحب صرخ ياعالم امساك

لازم ترجع الضحكه عله شفاي

ولازم ترجع اليه حيف بشفاك

خلقتك فاركتهه الحمدلله

لا ريدك تجي ولا الله وياك
لا ريدك تجي ولا الله وياك

##################

حاجيني ولو ماتحجي وياي

بس عندي كلام وأرد احاجيك

يالرسمك سكن بثنين الاعيون

يل من زغر سني اتولعت بيك

جنت بعيوني تغفه وأظل سهران

بشوكَـ ولهفه كَلبي اغطيك

اتعبت برباك كلش يا ضوه العين

وجمعتك كَطرة كَطرة اشلون ابديك

وحدر جدمك نحرت اسنيني قربان

وحته اكَليبي جبته وخاطر ارضيك

جبتها وهم بعد مطلوب الك دين

وخفت لمن تدك بيباني شنطيك

وآنه ابطرك روحي وعينك اتشوف

واذا تاخذها باجر وين اخليك

أحبك ,, بس أحبك حب مينقاس

أدوخك والله اذا عن حبي أحاجيك

اذا بالشارع انته وآني بالبيت

اسوي البيت شارع بلكي الاكَيك

رسل ربك اجو واحد وره اللاخ

ورسل حبك اجو كلهم سويه

مثل ما الانبياء جذبوهم الناس

جذبه إلي حجه يهمك عليه

ولك أذيتني وأذيت البيوت

صحيح انته حلو لكن أذيه

من تتمشه شفتك كَلت ياريت

أصيرن شارع وتسحك عليه

وتجي حضره جنابك من بعد هاذ

تشيل إيدك ولك من بين اديه

شنو شتريد اعوفك؟ والله بطران

أحبك عمي أحبك كَوه هيه

ماعوفك وحق من حطلك عيون

بس شلون حطهن عم عليه
بس شلون حطهن عم عليه

####################

عليك الله التفت خليني اشوف

ولو لحظة بحياتك حطني عالبال

يالطولك مثل .. مدري مثلمن?

لأن ماكو اليشبهك بين الاشكال

صدك أحله واحد انته بين الناس

واذا ماصدكَت ينحل الاشكال

اذا حورية أحط وابصفك اتصير

بالنسبة لجمالك جنهه رجال!!

تتحجب حلو وأحله بله حجاب

وشتلبس حلو لو تلبس اسمال

مشاكل ويه نفسي سببتلي

ولأن انته السبب مابيهه اشكال

من يطلع جمالك تدري شيصير

يصير بمنطقتنه حظر تجوال

لو موجود انته قبل الاسلام

جان حطولك بكل بيت تمثال!!

شنهو الراس ماحطك على الراس

حجايه على راسي احجاية التنكَال

ماسة تاج انته وعالي قدرك

ولازم فوك راس التاج تنشال

عليه اشكَد تلح ما أفتهم شي

لأن كَدام شخصل اوكَف اجلال

لذلك لمن اتوصيني اي شي

بس اتروح اكَولن ما ادري اشكال

مرة انته فتت من يم ابوية

ولمن شاف طولك فنك اشكال

ألا ليت الشباب .. ويرجع الحيل

وابوكَن هالحلو وإيحلهه حلال

اذا الشياب اصلاً دوختهم

إذن انته سبب ضحكات الاطفال

يالامدوخ شعب .. شمالك يخايب

اذا من الشعب عندك هالاقبال

أصير ابقائمة وبالأنتخابات

واشارك بالحكم يا بعد شيبي

واصير أحسن مواطن آني بالناس

لأنك هم رئيسي وهم حبيبي
لأنك هم رئيسي وهم حبيبي

###############

انته هم تشتاكـَ مثلي؟؟؟

آنه من كَد شوكي يسأل دربي عن احوال دربك

تدري ليش الحاله صارت؟؟

تدري ليش الدرب يسأل؟؟

جيف أحبك

تدري ليش انته اذا لاكَيت وجهي اتدير وجهك

جيف أحبك

جيف أحبك ليش من اتشوف وجهي اتدير وجهك

عفتك بكيفك تكَطع ابتوت كَلبي وما كَلتلك

انته من شفت الدمع من عيني سال

كَتلي وجهك هيج عندي أكثر جمال

وما كَتلك كله منك جيف أحبك

عفتك اويه اجروحي تلجمها اعله كيفك

كَطعتني وما كفاك ولا شبع من دمي سيفك

جني كَاتلك عزيز وجاي تاخذ مني حيفك

بيه تطعن .. بيه تجرح

وآنه من غصباً عليه امحالل وموهوب اكَلك

واذكر بمرة كَلتلي اكتب اسمي وحرت بأمري

ونزلن دموعي اعله وكتبن أسمك

مرة سجينة جبت اذبح كَليبي

حته مرة اللاخ ليكَلك حبيبي

وكَبل لاذبحه حجاهه وسمه علسجين بإسمك

واذكر بمرة ردت اشوفك وادري شوفك مستحيل

وتاهت الدنيا عليه مدري ظلمه مدري كَمره

مدري جانت صبح مدري الدنيه ليل

دورت عن روحي ماكو دورتهه ابصفي ماكو

روحي شردت وكَلت خل اسأل عليهه

شفت شخصك من بعيد

وشلت عيني وباوعت لن روحي يمك

بس اسألك؟ شفت غيري وكَلبك بحبه التها

وليش ماكَتلي ابصراحه البينك وبيني انتها

انته لازم تندم وترجع اليه

راسك امدنجه وتجيني اتبوس بيه

وتدري ساعتهه شأكلك

جنت أحبك جنت أحبك

##################

أكَلك من رخصتك دوكَف شبيك

تانيتك عمر بس لحظه تاني

سبحانه اشعجب ماخالق اثنين

منك والف واحد جنهم آني

ولك جلمة سلام وياي متكَول!

ولك سلم علي مو كَمت اعاني

مو قصة صلاة بس يمك اوكَف

بلكت من تسلم اسمع آني

أحب عيوني جي بيهن أحاجيك

ولأن يسكت اموتن من لساني

اذا كَدام وجهك انتظر ناس

ميهمني اذا سنتين اتاني

من شفتك اجتني هواي ضحكات

بس لمن رحت مدري شجاني

عله كيفك امعود ويه هالناس

أسولفلك عليهم من مكاني

مرة انته كَلت لليل أحبك

وصوتك ماوصل بس لذني آني

ولأن يدرون صوتك بذني موجود

لهسه الناس متعلكَه بإذاني

أحطك بالكَلب ألكَاك بالعين

أجيك لعيني ألكَاك بكياني

وتسأل عن مكانك والله بطران

أول شي دخل اندل مكاني

إلك آخر رسالة من شخص ما

راح اقراهه الك نصاً تره آني

إلى من صار عندي الكَلب والعين

وروحي ومهجتي وحبي وحناني

من ياصوب أجيك مو دخت بيك

شاعر للحزن وبكل كياني

كَالولي يغني وصوته محبوب

عفت الحزن كمت أكتب أغاني
عفت الحزن كمت أكتب أغاني

الأحد سبتمبر 09, 2012 1:27 am

أذهلتنـــي بـ الغمــوض وكثـــرة الحيـــره
حتــى بحثت الخفــى وأنت الخفــى كــلّـه

أخاف من حسبتـــكـ وأخشــى محـــاذيـره
خــوفــاً ملكـ مهجتــي والخوف من حــلّـه

تركتنــي لـ الـوهـمّ والـشـكـّ والغيــــــــره
وأنا الـذي مـــا وطيـت الــذنـب والــزلّــه

ليتــكـ وهــم وألتمــس عــذري وتبـــريـره
وليتــكـ حقيقــه وأحقـق حــلـم وآصــل لّـه

وش لــون تطــري عليّ دايــم السيــــــره
وأنت الـذي صــرت لـيّ زولاً وأنا ظـــلّـه

إن قلت أبنســـاكـ وأســــافر عن الـــديـره
ســـافر معــي هـاجســاً وإن طـال ما مـلّـه

من عــام الأول وأقــول الخيــر فالخيـــــره
حتـــى تمــــرد خفــــوقـاً عاقبـــــه خــلّــه

ياذروة الشـــــــوق سـوقي لي تبــــاشيـــره
الخــــوف يجتــــاحنـي لاجيت أبــادلّ لّــه

متقبـــــلاً صــدمتــــه وألقـــى معـــاذيــــره
وش عـــاد لو هــو يبــي غبنـــي وراضً لّه

قصائد عراقي

قصائد عراقي

رد: قصائد عراقي