يامحلة ذيج أيامنة الما ترد

الثلاثاء يوليو 24, 2012 2:21 am

يامحلة ذيج أيامنة الما ترد
من جان أملنة شايلينة بجنط
واحساسك الانثوي احساسي الخشن
بمدرسة حبنة يداومن مختلط
جان المعلم يطرد المايحل
ومن ماتجاوب آنة اطيح بورط
خاطر يطردني واجيلك ركض
لويسأل اعلة أسمي أجاوب غلط
الزعل عدالكبار يترك حقد
وجنة احنة أفهم من أهالي الوعي
جف الصلح منعرفة يعني شنو
تزعل وترضة بس أمد أصبعي
ومن ورة عيونك كمت أشخبط شعر
وبس عالفرح كتلي أكتب المسمعي
وجي أنتة يمي جنت أكتبة الفرح
بس درت وجهك جربيتة النعي
أطفال نمنة..!وأخذ حبنة الزمن
ولمن كعدنة مار بينة الكبر
وقلدت انتة انسان حب بوفة
وجنت آنة أقلد اليدك بس بحبر
أكتب حروفك فوك منهن نقط
وأتمنى كدامك يصيرن خضر
وأكشخ وأجيك العصر وأضرب ركن
وبحجة ترش بابكم تنتظر
منكول عيب الناس؟جي حب صدك
مومثل هسة دغش بن بستر
وتلاكفتنة الجامعات ومشت
أنتة بكتر ذبوك وآني بكتر
وذيج البراءة نمسحت من الوجه
المكياج سوة خدود وجهك صفر
كروبك بنية ومادري جم ولد
تركض وياهم ماعدت تنتظر
ولمن تعرفني صرت تنحرج
اتكلهم كرايب موحبيب الزغر...