هو وهي

الأحد يناير 01, 2012 4:13 pm

هو /

غازليني ..
يا أجمل بشر شافته عيني..
غازليني
و اعذريني ياحياتي
لو منك طلبت الغزل ..
انتي بس تحكي ياعمري
يقطر لسانك عسل..
تعذريني لو عرفتي
الغزل حلو بلسانك تنطقينه
مو بس انتي الـ تذوبي
من تسمعين الغزل ..

هي/

شلون كلمة غزل ينطق لساني
واني انسى من اشوفك .. كل كلامي
وانسى نفسي من كلامك
مدري يذوبني الغزل .. مدري يذبحني سلامك ..
اخاف اغازلك بخجل ..
لو اكلمك بعجل
وما اجاريك بكلامك ..
يخجل لساني يغازل
وانته استاذ الغزل ..

هو /

مو عذر لمن تخجلي
خجلك يحليك اكثر
يمه تقتلني خدودك
انته تخجل .. هيه تحمر
هم تذوبني شفاتك
اهي ماي وانا سكر..
عني لاتبعد حبيبي
اقترب ياروحي اكثر
غازليني
يكفي اسمي تنطقينه
لو شعورك توصفينه
تعذريني لو عرفتي
ان الحكي بين الحبايب
كل حرف بقصيدة غزل

شفتي مو صعبة يا حبي
هذا الـ يسمونه ( غزل ) ..

هي /

اسمك احلى من كلامي
( مو غزل .. هذا اعتراف)
وقلبك ينبض بس حنان
وصدرك دنيا من الأمان
أرتمي به من اخاف ..

(مو غزل .. هذا شعوري )
في الظلام تصير نوري
ياقمر بالليل تضوي
مايخالفني بكلامي
كلّ من بعيونه شاف ..

انته وسط احزاني فرحة
وانته بلسم كل جروحي
و الضيا و العين انته ..
و هالحكي كله يا روحي
( رأيي فيك .. بس مو غزل )

هو /

مو غزل هذا اللي قلته !!
الله يستر لو تغازل ..
غيمة تمطر بالحكي
وكل كلام الحب نازل ..

ودي احتظنك واضمك
واحبسك وابدا ما عوفك ..
يموت قلبي لو يهجرك
وتعمى عيني الـ ماتشوفك ..
ادري بـُعدك ياحبيبي
مو هجر ادري وغلاتك
ادري كم صعبة ضروفك ..

لو تفارقنا حبيبي
لا تجي انا اجي لك
اكحل عيوني بشوفك ..

اشد رحالي واجيك
وأوصل لدارك واحجّـك
والبس حرام العشق
وسبعة أشواط اطوفك ..
وارمي جمرات البعد
ارجم ظنونك و خوفك ..
و أنحر الشك والزعل ..
وأحنـّي بدمي كفوفك ..

وما اخلي من الكلام
الا كلمة غازليني ..
وما اخلى من الفعل
الا الغزل ..

( هذا رأيك .. مو غزل )
( مو غزل .. هذا اعترافك )
( مو غزل هذا شعورك )

احكي لا تسكت حبيبي
واطفي بحكيك لهيبي
استمري بالكلام ..
و غازليني بــ( مو غزل )