قبل متشتري فلاش اقرا موضوعي

السلام عليكم ورحمة الله و بركاته

مثل متعرفون اكو هواية نوعيات فلاشات بالسوك (ماشاء الله ) اشكال و انواع و المستوردين احيانا ايجيبون اتعس الانواع علمود السعر ايصير رخيص و الناس تشتري .
زين اشلون اعرف الفلاش مالتي زين لو لا ؟ مضروب لو لا ؟ حجمة صحيح لو لا ؟
خل انشوف عندي كم طريقة اعتقد اتفيدكم و اذا اكو احد الاعضاء الكرام ايريد ايضيف و ينورنا اكون ممنون
علمود الافادة اتصير للجميع

أعراض الفلاش الي شغلتة تعبانه وتجاري

1-من اتخلي الفلاش الحاشبة متقراه او مرة تقرا و مرة لا

2-من اتخلي ملفات بالفلاش تتحول الي ملفات غريبه او فولدرات

3-من تخلي ملفات بحدود الحجم الاصلي ماكو مشكلة اذا زاد الحجم الجهاز يقفل او الحاسبة تصفن

4-من اتخلي ملفات و اذا حجمها جبير يكولك الفلاش محمي و اذا كان صغير لا مشكلة . هههههههه اشكد لوتية الصينين


الشغلة قديمة مو من هلوكت و مو بس الفلاش مرات mp3 mp4 ipod و اغلبكم مارة عليكم هيج امور

زين هسة نجي للحلول

اول شغلة من تشترون فلاش اخذو من محل ثقة و ماركة زينة و اطلبو ضمان
حتى اذا السعر اغلة شوية ميخالف (ترا اذا اخذتو نوعية تعبانة البطانة تطلع اغلى من الوجه)

ثاني شغلة او ثاني حل

انسخ على الفلاش ملفات بحجمه و شوف ياخذهن لو لا و ارجع انسخهم علي الحاسبة و شوف الحجم الكلي و شوف الملفات شغاله لو لا

طبعا راح تاخذ وقت خاصة ويا الفلاشات الجبيرة بس اتصور أأمن طريقه و متاحه للكل

ثالث حل
اكو برامج خاصة بصيانة الفلاش و تصيح الاخطاء افحص الفلاش جربها و شوف

و اكو مواقع خاصة بصيانة الفلاش و هاي روابطهن لعيون الطيبين

http://sosfakeflash.wordpress.comhttp://fixfakeflash.wordpress.com

و اخر شي توضيح للاخوان الي حيقرون الموضوع
هذا الموضوع خاص بالفلاش الجديد و ما اتطرقت للفايروسات هنا احجي عن سوء التصنيع فقط
و اي استفسار اني حاضر
منتظر ردودكم
تحياتي