رهمتك عليه

الأحد مارس 11, 2012 5:44 pm

رهمتك علي بس مارهمت وياي انت الماردت شتريد اسويلك..

عاشرتك نجم من جان عمرك ليل أذوب وأشتعل حتى ابقى اضويلك..

ومن طلعت شمس خط رجعه ماخليت ماجازيتني لمن خلص ليلك..

بانيلك جنت حضرة عشگ بالروح ومرقد للمحنه بروحي بانيلك..

ردت منك مراد وخذت مني مراد وعلگ بجفوفي شايلهن زناجيلك..

وانذرلك جنت وافتر وأحني الباب اتهدمت ياباب احنيلك..

امانه اسرار عمري وبيها ماوصيك يم شباج ذنبك صاحن ادخيلك..

وبكيفك بعد صون الامانه تخون ماأگدر بعد اغفر واعديلك..

مابينك وبينك عشت هاي وهاي مره ابجي اعله طبعك مره اغنيلك..

بدلالك جن طفل بالجرح مال اكبار اشد الجرح بيد وبيد ألوليلك..

لاتنصف عدل لاترضه بالمقسوم تاخذ حصتك ومن حصتي اخليلك..

انته الوزعت والفرح سهمك صار من سهم الحزن يافرحه اوديلك..

جبتها وياك شعره وعاقل ومجنون كلساعه وتجرها وانا ارخيلك..

شلي بهل التعب والعمر وشلة كاس من كاس العمر جم دوب ابديلك..

راح اصبر بدونك وارهم بلياك وأذبح رمش عيني الجان يبجيلك..

واتحمل عذابك والبعد والشوگـ وماحط صورتك كدامي واشكيلك..

مااگلك نسيتك بس جرح بالروح يكسر واهسي ومايقبل امشيلك..

عيني الشالتك گلتلها اشيلج راح گالت شيلني وماقبلت اتشيلك..

وجرحي الفاك صدره ومايريد اخياط واگف جنه واحد جاي يدعيلك..

بس مجبور ادفنك ياعشگ ياشوگـ واقره الفاتحه وبالوحشه اصليلك..

بعيوني الحزن يقرونه اليواسون والفوگـ الحزن لو تدري شحجيلك..

شمات الأجو واسوني ثالث يوم حيل وياك گالو مدري شد حيلك..

وگـالو مو حلو الثوب الطويل عليك واليكصر بعد لتظن يكفيلك