زعلان

الإثنين يناير 09, 2012 2:13 pm

زَعْلان..

أفَكِّر بِيك وآنه بحَضرَة اللِّيل

وذِبَل جِفنِي وبَعَد مَا يَاخِذ النُّوم

حَالِف مَا أنَام وإنتَه زَعلان

شلُون ارتَاح وانتَه بگلبَك همُوم

كُون جنَاح عِندِي وحَتَّه اطِيرَن لِيك

واگِلَّك مِن حَنَانَك آني مَحرُوم

واسألنِي علَى حَالِي وشُوف بِيَّه شصَار

اعِت بِالحِيل گُوَّه ومَا رِضَه يگُوم

لأن إنتَه العُمُر وفرَاگك الـمُوت
وَعَد مِنِّي إلَك أهوَاك للدُّوم

شلُون ارضِيك گِلِّي وآنَه عِد عِينَاك

تامِرنِي وأگلَّك حَاظِر ومَفهُوم

صَدِّگنِي الزَّعَل يِشعِل بگلبِي النَّار

طَفِّيهه برِضَاك وخَلِّي حُبنَه يدُوم

وانسَه اللي جَرَه ولَتكَبُّر الـمَوضُوع

لأن جَرحِي صُفَه بفَرگَاك مَلچُوم

واندَهنِي بتَرافَه وخَل اسمَع صُوت

وخَل وجهَك بَشُوش إبَّسْمَه مَرسُوم

گِلِّي مسَامحَك واروِي العِطَش بِالرُّوح
ونحِل القَضِيَه ونِفضَح الـمَكتُوم

وارَاوِيك العِشِگ وانثِر بگاعَك شُوگ

واحْلِفلَك بَعَد مَا أزَعلَك يُوم

ضُم حُضنَك بحُضنِي وخَل احِسَّن بِيك

وابَات الليل يَمَّك و احسِب نجُوم

وانسَه ويَاك رُوحِي العاشَت بَلَيَّاك

مِثِل شِجرَة اتِّنَطَّر نَث الغيُوم