أكابر في حياتي

الخميس يناير 05, 2012 3:09 pm

أكابر في حياتي واَنه مجروح
ولا فد يوم صحت اتلاحكوني

واَركض عالجروح ابشوغة الروح

ولا بينت دمعه من عيوني

بس كَلبي أبونينه دوم مفضوح!

خفت منه يون أويسمعوني

عزة نفس بيه وين ما اروح

ويعرفوني أصيل الرافكَوني

لونِ اَجوع ويحطوني عَالوح

ما أمد ايدي واَسئلهم انطوني

الله ما يخلي حمل مطروح
أبد بالله ما خابت ظنوني

على كسري اردسي ابد ما انوح
ولايهمني يدنيه أشما تكوني

لو دحتي علي ويه الزمن دوح
...أبد هيهات لا ما تذلوني

ابو الغيره ترى لو اضحي بالروح
ما اخلي الشماته إ يعَيروني

النخوة عطر بانفاسي واَتفوح
ومبينهَ عَلَي حتى أبسكوني

وراسي بالقمم ما طخ للسفوح
ولا من خوف مرة انخطف لوني

اَذب حَر الجمر مابين الجروح
ابنزفهن لو عواذل صادفوني