ميلوك الضحك للقلبه تعبان

شصاير بيك حقك لمن أتكول
الصارن بيه ما ينحسبن هواي

أنه من البيت أطلع شايل هموم
و أرد شايل هموم شلونك بهاي

لا جنحاني عانني وطرت فوك
ولا رجليه عانني أعله ممشاي

و أيدي اليسرى كصرت بعد متلوح
و أكصر منهه جا شتلوح يمناي

كلش مالي واهس والخلك خيط
وصارت زرف أبره بعيني دنياي

أذا لاكيت غيري ايجوز ترتاح
وأذا لاكيتني عاشور ملكاي

وانته تريدني أضحك ؟ أضحك شلون
وانه جم خنجر المزروع بجلاي

وميلوك الضحك للقلبه تعبان
وجرح وي دمي يفتر رايح او جاي

وانه اوداعتك مو مال ضحكات
أخصائي بجي سوتني دنياي

شلون تريدني ألكه أفياي بالصيف
وانه أبعز الشته ملكيتلي أفياي

امسلمني الحلوه شاهن جنهن طيور
وظلن كشش عمري وماكو شراي

حزني شلونه حزني أشكال والوان
شنو لون الفرح تعذرني من هاي

عليه ثوب الهموم أمفصل أفصال
وكلش على كدي ولايك أوياي

أنه أبدرس الفرح ماخذ صفر دوم
ومية بالحزن حطتلي دنياي

الناي أشكد حزين أيبجي الناس
وظل ياخذ درس من حزني الناي

ربه وياي حزني وكمت أماشيه
وتعلم حتى كام أيبات وياي .


مما راق لي

وااااو على الكلام الرائع والمؤثر احمد الورده

تقبل مروري

اسعدني مرورك شكرا على الردود الطيبة

اه احمد كلام معبر جدآ الى درجه ،بس يقهر كلش الله يبعد القهر عن الكل"""

ابيات اكثر من روعة وتشبيه مؤثركثيرجدا يسلمووو يداك على هذه القصيده الجميلة تقبل كلمات البسيط امام هذه الابيات المبدعه

اجت بوقتها احمد

شكرا اخواني واسال الله يبعدالهم عنكم ويسعدكم دنيا واخرة [ندعوك للتسجيل في المنتدى أو التعريف بنفسك لمعاينة هذه الصورة]