دوس على الوكت

الإثنين يناير 02, 2012 5:22 am

دوس اعله الوكت

واتحده طاري الموت ..

دنياتك غضب يا صاحبي اتحده

وادبج عالسطح

خل يلغي راعي البيت

ليكلك نزل وتخاف من عنده

دنيه ابلا رحم لو بيه ذيب اصير

لو تبقه الذليل المحد ايعده

***

يا يوسف .. عليك اشكثر .. جار الضيم

كلما مر ظلم

جر ثوبك وقده

ومن كابح زمانك والستر خوان

محد ظل الك بس ظلت البرده

يعني ابلا خجل .. شد جرحك الماذيك

لا تنطر يجيلك واحد ايشده

واتذكر ..

زمانك .. حد عليك السيف

خل سيفك يفز من نومته ابغمده

حد نحر الظلم هذه اللفاك اسنين

وبنحر الظلم هم خنجرك حده

دنيه ابلا رحم .. لو بيه ذيب اصير

لو تبقه الذليل المحد ايعده

***

غلطان البشر .. من راصف الحيطان

يا حايط ولك تتدربن ابسده

مو هذه الوكت شص او نتل صياد

واخو خيته اليطلع صيدته لوحده

واخو خيته الضحك ..

لو مر عليه عربيد

واتحايل عليه .. واتحزم ابجلده

با خويه الوكت صدكني بس الصيت

ينذل ينكسر لو واحد ايرده

اخذ عبره ..

الجبل من تهز كاعه ايطيح

بس جيب اليهز هالكاع ويهده

ويهد السبع ويذله حد الموت

ويخلي ابفخر نسوانه معتده

دنيه ابلا رحم لو بيه ذيب اصير

لو تبقه الذليل المحد ايعده

***

كبل راح ابكبل .. صح كلنه جنه ابخير

بس هسه الوكت

لازم تكف ضده

شل اليحرجك .. واتحسبه من الليل

واتعشا كبل لا بيك يتغده ...!

صير انته الصلب ..

والمستحيل ايهون

والموكده ابد لتكول .. مو كده ..

اخذ طبع الطبر .. من يلزمه الحطاب

صح طوله متر .. بس كلشي ميصده ..

والغفله التمر ما بيه ليك الخير ..

هجمات الوكت معروفه مرتده ..

والعب بالصبر صدكني ما خسران

ورقات الصبر كل ناقص اتسده ..

دنيه ابلا رحم لو بيه ذيب اصير

لو تبقه الذليل المحد ايعده ..

***

جدمك من يزل ..

عن درب بالك راح

ولا واحد يذكرك جاب لو وده

والصاح البنالك بالكلام اقصور

تلكا ينهزم لو شافك ابشده ..

فرق .....

بين الحفز .. وبروحه ضمك حيل ..

وفرق بين اليغدرك وانته التوده ..

وفرق بين الزرعلك بالدرب عاكول ..

وفرق بين الزرعلك .. بالدرب ورده ..

دنياتك ...

بحر بيه الجزر معلوم

بس كونك تصل يا صاحبي لمده

بس كونك تفرزن فرت الناعور ..

من يفتر عكس هم مايه يتبده ..

هم هذه .. الحزن لو فصليته اثياب

يرهم للوكت يتفصل ابكده ..

والضاد الطغت عالناس خمس اسنين

هم تكدر تشيل الضاد والشده

والبسته كبل وخدوده من تيزاب

هم تكدر تبوسه انوب من خده ..؟

دنيه ابلا رحم لو بيه ذيب اصير

لو تبقه الذليل المحد ايعده